LAOAG CITY – Inpasigurado ni Mr. Cipriano Perry Martinez, Acting General Manager ti Ilocos Norte Electric Cooperative wenno INEC nga awan ti masapol a pagdanagan mainaig iti suplay ti kuriente ditoy probinsia iti panawen ti kalgaw.
Inbatadna nga adda ti gundaway a bumaba ti 40 megawatts ti konsumo ken adda met ti panagngatona agingga iti 60 megawatts ngem uray ngumato ket adda latta ti diperensiana nga 8 megawatts.
Inlawlawagna a no dumakkel ti konsumo ket adu dagiti mabalin a pangalaan ti nayonna kas ti embedded a 10 megawatts a solar ken windmill ngem manarimaan pay laeng ti negosasionda.
Kunana no bilang saan pay a malpas ti negosasion ket mabalinda a mangala ti suplay ti Wholesale Electricity Spot Market ngem posible laeng a ngumato ti rate gapu ta no panawen ti kalgaw ket ngumato met ti presio ti Wholesale Electricity Spot Market.
Kabayatanna, no maipanggep ti panag-brownout, kuna ni Martinez a saan a gapu iti panagkurang ti suplay ti kuriente ti rason no di ket adda dagiti transformers ken dadduma nga electric structure ti daanen ken maperperdin.
