LAOAG CITY – Agtultuloy pay laeng ti naiget nga imbestigasyon ti Philippine National Police (PNP) Laoag no anya ti motibo iti pannakabagkong ti maysa a security guard bayat a nakaduty iti Grand 88 Bingo iti Barangay 19 ditoy ciudad.
Napasamak daytoy iti 5:30 iti parbangon iti kalman ken agpapan ita ket awan pay ti pakabigbigan ti suspek.
Segun kenni Police Chief Master Sergeant Christoffer Tungpalan, chief investigator ti PNP-Laoag, agtugtugaw ti biktima ken saan na a nadlaw a nagna ken immasideg kenkuana ti suspek.
Kunana nga idi nakaasideg ti suspek ket inturok na ti kutsilyo iti tengnged ti biktima ken rumrumuar a gandat na nga alaen ti service firearm ti security guard.
Nupay kasta, inbatad na a posible a saan unay a nakatutok wenno saan a naidegket ti kutsilyo iti tengnged ti biktima isut gapo na a naiggaman ti guard ti ima ti suspek ken panaggubal da a nangitunda ti pannakabagkong ti security guard partikular iti akin-kannigid a barukong na.
Kalpasan daytoy, dagus a naglibas ti suspek idinto a ti biktima ket naitaray iti ospital ken nakaruar met laeng.
Agpapan ita ket saan pay a nabigbig ti suspek gapo ta nakasuot ti helmet idi immasideg iti security guard ken ginandat na nga alaen ti paltog daytoy.
Mainaig iti daytoy, kuna ni Tungpalan nga adda dagiti rebelasyon kadakuada ti biktima nga isu ti manarimaan nga im-imbestigaren da.
Kunana a manarimaan metten ti panagsursur da kadagiti estabslimento nga adda ti CCTV na no na-capture daytoy ti suspek.
Naamoan da pay nga idi nakaduty ti biktima ket awan ti service firearms da gapo ta iti panangrugi ti election gunban ket innala pay laeng ti kompanya da.
