LAOAG CITY – Sumango ti kaso a murder ti suspek iti napasamak a panagtagtagbat a nakatayan ti maysa a drug surrenderer idiay Sitio Nagsaad Brgy. Sagpatan, Dingras, Ilocos Norte.
Immuna ti daytoy, dead on arrival iti Piddig District Hospital ti biktima a ni Michael Ballesteros, agtawen ti 38, naasawaan idinto a ti suspek ket ni Sammy Alejo, agtawen ti 20, maysa a construction worker ken mannalon, agpada dagitoy a residente iti met laeng nadakamat a baranggay.
Iti ekslusibo nga interview ti Bombo Radyo Laoag kenni Pol. Lt. Belen Baoit, Deputy Chief of Police iti ili a Dingras, kabayatan ti panaggiinom ti biktima ken suspek, pakairamanan dagiti sumagmamano a kakadwa da ket nagtutulag da nga agparti da ti aso.
Nupay kasta, kinontra daytoy ti biktima gapu ta maiparit ti agparti ti aso ken naibagana a dagitoy ti partien na.
Segun ken ni Baoit, inur-uray ti suspek a pumanaw amin dagiti kakadwa da nga aggiinom ken idi agmaymaysan ti biktima ket ket ditoyen a tinagtagbat na iti namin-14 a daras.
Inpakaammo ni Baoit a dagus a natiliw ti suspek ken ibilang dan a nasolbar ti kaso.
