LAOAG CITY – Natiliw ni Dodi Dong Baroso Espejo, addaan ti umno a tawen, naasawaan ken residente iti Barangay Sagpatan iti ili a Dingras kalpasan a maipagarop a pinaltugan na ni Orlando Rafada Jr., agtawen ti 31 ken residente iti Barangay 12, Magat Salamat ditoy ciudad ti Laoag.
Napasamak ti insidente iti paset ti Mc Kinley St. iti nadakamat a barangay ngem nagasat gapu ta saan a natamaan ni Rafada.
Basar iti imbestigasyon, kabayatan ti panagsabat dagiti dua a ti biktima ket nakalugan ti pribado a traysikel ken ti suspek ket nakalugan ti motorsiklo ket adda ti nagririanda.
Iti panagresponde dagiti otoridad ket nakarekobre da iti nakapasamakan ti insidente ti uppat a pedaso ti fire cartridges ti maipagarop a 9mm ken maysa a maipagarop a deformed slug ti isu met laeng a paltog.
Kinumpirmaran ni Police Staff Sergeant Gary Bolusan iti PNP ditoy ciudad ti Laoag a saan nga agam-ammo ti suspek ken biktima.
