LAOAG CITY – Agtultuloy a birbiruken dagiti kameng ti PNP-Laoag lalaki a nangitaray ti bag a naglaon ti nabalor a kagamitan idiay Barangay 15, P. Gomez St. ditoy ciudad ti Laoag.
Nabigbig daytoy a ni Elmar Aguete, residente iti Barangay 38-B, Mangato ditoy met laeng ciudad idinto a ti biktima ket ni Mr. Joel Patong Manuel, agtawen ti 43, naasawaan, maysa a contractor ken residente iti Barangay Poblacion 1 iti ili nga Adams ngem agnanaed iti Barangay 15 ditoy ciudad.
Iti imbestigasyon dagiti otoridad, matamturog ni Manuel iti pagnanaedan na iti nasao a barangay ken idi nakariing ket nakita na a limmabas ti suspek iti ayan na nga adda ti bitbit na a back pack.
Naamoan a kinamat ti biktima ngem napaay gapo ta nakaluganen ti suspek iti maysa a motorsiklo.
Naitaray ti suspek ti 11 a ribo a pisos, dua a cellphone ken maysa a nabalor a pantalon.
