LAOAG CITY – Manamnama ti pannakaipila ti kaso a Theft wenno panagtatakaw kontra ken ni Mr. Neil Jay Christian Gamet, agtawen iti 21, addaan ti live in partner ken residente ti Brgy. 18, San Pedro iti ili ti San Nicolas.
Daytoy ket kalpasan nga adda ti report a maipagarup a nagtakaw ti suspek ti dua a kalding iti ili ti Currimao.
Segun ken ni Mr. Vivencio Labacug, mannalon ken residente ti Brgy. Sta. Cruz iti ili ti Currimao, apaman a mapanna koma iyakar dagiti tarakenna a kalding ket ditoyna a nakita a mapukpukaw ken nakawarwar metten ti tali dagiti tarakenna a kalding nga agmaris ti puraw ken brown.
Gapu iti daytoy, indanon ni Labacug daytoy a pasamak iti Currimao Municipal Police Station tapno maduktalan ken makemmeng ti adda iti likudan ti panagtakaw dagiti dingwenna.
Mainaig iti daytoy, babaen iti ala ti Close Circuit Television ket nabigbig ti suspek rason a dagus a nangiwayat ti hot pursuit operation ti Currimao Municipal Police Station ken San Nicolas Municipal Police Station ket ditoy a balligi a naarestar ti suspek.
Kabayatanna, naammoan a dagiti dua a kalding ken ti kurong-kurong a mapapati a nausar iti krimen ket mausar kas ebidensia kontra iti suspek.
