(Update) LAOAG CITY – Boluntaryo a simmuko iti PNP ti suspek iti napasamak a pammaltog iti paset ti Barangay Balatong ditoy ciudad ti Laoag.
Nabigbig daytoy a ni Dennis Balgos, taga Barangay Paltit iti ili ti Badoc, naikamang idiay Barangay Uguis, Nueva Era ngem agnanaed iti Barangay Balatong ditoy ciudad ti Laoag.
Inbatad ni Police Supt. Dominic Guerrero, chief of police ti PNP-Laoag, bayat nga agpapaandar ti kurong-kurong ti biktima a ni Romeo Jose ket nalabsan ni Balgos kageddan ti panangibaga na a puuran na laengen gapo ta saan nga agandar.
Gapo iti daytoy, maipagarop a nakapungtot ti biktima ket nagsao ti dakes ken mabalin a madi ti epekto na daytoy iti suspek isut gapo na a nagawid ken idi nagsubli ket pinaltogan na ni Jose.
Naamoan a saan pay a nadeterminar no anya a klase ti paltog ti nausar gapo ta awan ti kapsula a nausar ngem mabalin nga addaan daytoy ti revolver.
Kinumpirmaran na a sakbay ti pammaltog ket napan nagluto ti suspek iti nagpamunpun ken kalpasan ti krimen ket napan pay laeng nakipangan daytoy.
