LAOAG CITY – Inpasingked ni Syrian leader Ahmed al-Sharaa a pagsungbaten na dagiti adda iti likudan ti pannakapapatay ken pannakaidadanes dagiti sibilyan manipod iti Alawite religious minority.
Rakurak daytoy ti Syrian leader kalpasan a naakusaran ti Syrian security forces a nangpatay iti ginasut a sibilyan manipod iti Alawite sector.
Immunan nga inbatad ti UK-based monitor nga umabot iti 830 a sibilyan ti pinuntirya dagiti napasamak a massacre ket dagiti Alawites iti west coast iti Syria.
Iti panagbitla ni Shaara, inkari na nga anupen na dagiti nagtalinaed a napudno iti napadisi iti pwesto a ni dati a President Bashar al-Assad.
Inpetteng na pay nga awan ti nangatngato ngem iti linteg isut gapuna a siasinno man a namantsaan ti ima na iti dara dagiti Syrians ket sumango iti hustisya iti kabiitan a panawen.
Innayon na nga addan ti nabukel nga “independent committee” tapno isu iti mangtutuk a mangimbestigar iti mapaspasamak a kinadamsak kontra kadagiti sibilyan ken masapol a bigbigen da dagiti responsable.
