LAOAG CITY – Dinayyeg ti magnitude 6.4 a ginggined ti southern Taiwan.
Basar kadagiti otoridad, narikna ti ginggined iti asideg ti Chiayi City itay parbangon ita nga aldaw ti Martes.
Adda ti kaunegna a 9.4 a kilometro ken ti epicenter ket iti ili ti Dapu iti Chiayi county.
Nangitunda ti apagapaman a pannakadadael kadagiti sumagmamano a pasdek no sadinno adda dagiti sumagmamano nga insalakan dagiti rescuers nga indibidual a saan a nakaruar iti Tainan City.
Masarakan ti Taiwan iti nagbaetan ti dua a tectonic plates isu a masansan ti panagginggined.
Naudi a nakapasar ti ginggined ti Taiwan ket idi Abril iti napalabas a tawen nga adda ti 7.2 magnitude a panagdayyeg iti Hualien county a nakatayan ti 13 nga indibidual.
Kabayatanna, adda ti sumurok 100 a tattao ti pimmusay gapu iti ginggined iti southern Taiwan idi 2016 ken idi 1999 ket sumurok dua a ribu nga indibidual ti natay iti panagdayyeg ti magnitude 7.3 a ginggined.
