LAOAG CITY – Maisagsaganan ti maipila a kaso a kontra kadagiti tallo nga indibidual a nagtakaw iti maysa a shopping center iti Brgy. 17 ditoy ciudad ti Laoag.
Basar iti Philippine National Police, dagiti suspek ket agtawen ti 41, naasawaan ken residente iti Purok 129, Brgy. Wangal, La Trinidad, Benguet; agtawen ti 42 a residente iti Purok 126, Brgy. Wangal, La Trinidad, Benguet; ken agtawen ti 60, naasawaan ken residente iti #4 Bronze St., Brgy. Tugatog, Malabon City.
Iti imbestigasyon dagiti otoridad, inpan ti maysa kadagiti suspek dagiti nagduduma a produkto iti girdle a nakasuot iti kadua na ken ti maysa pay ket nagserbi a lookout.
Nupay kasta, adda ti nakakita kadagitoy ken sinurot na dagitoy no agbayad da iti cashier ngem idi nagderetso dagitoy iti exit ken inbaga na iti security guard.
Ditoy a nakumpiskar da dagiti produkto a tinakaw dagiti suspek nga agbalor amin iti 15 a ribo a pisos isut gapo na a tiniliw da dagitoy ken inpaima da iti pulisya.
Iti agdama, dagiti suspek ket nakabalod iti Philippine National Police ditoy ciudad ti Laoag ken sumango da iti kaso a panagtatakaw.
