LAOAG CITY – Agserbi ti tallo a baro a doktor iti Gov. Roque Ablan Senior Memorial Hospital ditoy siudad ti Laoag.
Segun ken ni Dr. Rogelio Balbag, Hospital Executive Director ti Ilocos Norte Hospital and Management Council, dagiti nasao a doktor ket Internist ken dua kadagitoy ket nakatutok iti emergency room.
Inbatadna nga adda ti sumurok-kumurang 40 a doktor nga agserserbi iti ospital.
Maipalagip nga inpakaammo ni Balbag nga agkasapulanda ti tallo a doktor gapu ta maysa kadagiti doktor ket agretiro iti masungad nga aldaw.
Kabayatanna, kunana nga iti agdama ket ikarkarigatanda a manayonan pay dagiti doktor nga agpapaay kadagiti district hospital nangruna ket agkurkurang ti doktor kas ti Pancian Hospital no sadinno a dagiti doktor manipud iti Bangui District Hospital ti mapan bumisbisita.
Nupay kasta, kuna pay ni Balbag a nanayonan ti doktor iti Bangui District Hospital nangruna iti Surgeon gapu ta addaandan ti bukud nga operating room.
