LAOAG CITY – Kumpirmado a naimbitaran dagiti tallo a kababaknangan iti intero a lubong iti inagurasion ni United States President-elect Donald Trump nga isuda Elon Musk, Mark Zuckerberg ken Jeff Bezos.
Segun ken ni Bombo International News Correspondent Rene Ballenas manipud idiay Estados Unidos, daytoy ti umuna a gundaway nga agatendar dagiti maibilang a tallo a kapapatgan a bisita ni Trump iti inagurasionna a maiyuswat iti uneg ti United States Capitol Washington, DC inton Enero 20.
Inbatadna a dumanon iti lima a ribu a national guards ti nadutokan nga agbantay tapno maipasigurado ti kinatalged iti aglawlaw.
Inlawlawagna nga awan met ti makitkita a plano nga agiwayat ti tignay protesta da United States President Joe Biden ken US Vice President Kamala Harris kageddan ti inagurasion ni Trump.
Kunana a naruay a tattao idiay Estados Unidos ti agtipon a ragsak ken danag ti marikriknada iti inagurasion ni President-elect Trump gapu iti posible a panagngato ti presio dagiti nagduduma a produkto idiay Amerika apaman a pormalen a makatugaw iti puesto ni Trump.
Innayonna a mamati daytoy a kalikagum da Biden ken Harris ti nakappia a pannakaiyakar ti bileg manipud iti agdama nga administrasion iti sumaruno nga administrasion.
