LAOAG CITY – Balligi a naarestar iti naiyuswat nga anti-illegal gambling operation dagiti tallo a lallaki a nagsusugal iti Sitio Lubbot iti Brgy. 31-Talingaan ditoy siudad ti Laoag.
Binigbig ni PMaj. Rommel Ramos, ti deputy chief of Police ti PNP Laoag dagiti suspek a da Michael Gumarit Nicolas agtawen ti 41, naasawaan, agpapay kas Executive Assistant iti C&J construction ken residente iti Brgy. 22 ditoy siudad; Norman Calipio Gomez, agtawen ti 45, naasawaan, kameng ti civil security unit (CSU) ditoy siudad ti Laoag ken residente iti Brgy. 31 kenni Erwin Gabriel Domingo, agtawen ti 33, baro ken residente iti Sitio Umak iti metlaeng Brgy. 31 ditoy siudad.
Segun ken ni Ramos, namunganay ti pannakaiyuswat ti operasyon kalpasan nga adda ti nangipakaamo kadakuada mainaig kadagiti agsusugal iti Sitio Lubbot.
Inbatad na nga iti panagturong da iti lugar ket dita a naaktuan ti panagsusugal dagiti suspek.
Nakumpiskar ti lamisaan, tallo a tugaw, baraha, bet money nga agdagup ti 2,450 a pisos.
Iti agdama ket nagtalinaed iti kustodyar ti PNP-Laoag dagiti suspek bayat a maisagsagan ti maipila a kaso a panagsalungasing iti PD1602 wenno ti illegal gambling law kontra kadagitoy.
