LAOAG CITY – Naarestar dagiti tallo a lallaki gapu iti illegal a panagsusugal da iti Barangay 24 ditoy ciudad ti Laoag
Nabigbig dagiti suspek nga isuda Mario Castillo, agtawen ti 48; Pablo LOrenzo, agtawen 72; ken ni Alberto Pasion, agtawen ti 37, agpapada dagitoy a residente ditoy ciudad.
Segun ti report, naaktwan a mismo dagiti otoridad ti panagay-ayam dagiti suspek ti tong-its.
Nakumpiskar pay dagiti otoridad iti lugar ti 52 a pedaso a baraha nga agmaris ti asul, 790 a pisos a maipagarop a taya da, tallo a tugaw, maysa a lamisaan ken ti kwarta dagiti suspek nga agdagop amin ti P1,125.00
Rumrumuar a nagsusugal dagiti suspek gapu ta masikuran da iti kaawan ti ar-aramiden da kabayatan ti Enhanced Community Quarantine gapu iti covid-19.
Iti agdama, nagtalinaed dagiti suspek iti kustodyar ti PNP-Laoag kabayatan a maisagsagana ti reklamo a maipila kontra kadakuada.
