LAOAG CITY – Inpetteng ni Sang. Bayan Member Mark Dennis del Castillo iti ili ti Solsona nga agserbi a ballaag kadagiti sumagmamano a pulitiko ti nadakamat na iti privilege speech kabayatan ti regular session idi kalman.
Daytoy ket mainaig iti maipagarop a kaaddan ti tallo nga hired killers iti ili ti Solsona a naggapo iti probinsya ti Abra.
Segun kenni Castillo, nadakamat daytoy ti timmawag kenkuana a pagayam na idiay Cagayan gapo ta ti maseknan ket adda met ti am-ammo na idiay Abra.
Kunana a basar iti pagayam, maipagrop a tallo nga hired killers ti adda ita iti ili da ngem saan na nga ammo ti eksakto a lokasyon dagitoy.
Inlawlawag na a kalikagom na a ballaagan dagiti pulitiko partikular kenni Vice Mayor Bob Sacro ken ni Sang. Bayan Member Jovencio Pascua nga isu ti maipagarop a kangrunaan a target.
Kinumpirmaran ni Del Castillo nga ammo na no siasinno ti nang-hire kadagiti maipagarop a “killers” ngem nagkedked a manginagan no siasinno.
Inpalgak na a naireport na metten iti Philippine National Police para iti validation no pudno daytoy wenno saan.
Mainaig iti daytoy, inpetteng ni Del Castillo nga awan ti nadakamat na a sabali a partido kabayatan ti privilege speech na ngem maipagarop a pulitiko ti nanghire kadagitoy.
Inbatad na pay nga inrakurak na daytoy a banag kabayatan ti regular session tapno maamoan ti konseho nga adda ti kastoy a dimmanon nga impormasyon kenkuana.
Innayon ni Del Castillo nga adda ti patta-patta ti grupo da no siasinno ti maipagarop a posible nga akin-aramid daytoy a banag.
Kabayatanna, inbatad ni Del Castillo nga itay napan a tawen ket addan ti nanggandat iti biag na pakairamanan kenni Konsehal Jovencio Pascua ken bise mayor Sacro.
