LAOAG CITY – Naminpinsan a nauram ti maysa a balay iti Barangay Corocor iti ili ti Bacarra.
Segun iti agtagikua ti balay a ni Mr. Jovencio Buduan, agarop alas-siete idi rabii ket napan nagpakan ti aso ti asawa na, ken idi agsubli iti balayda ket nakita na a dakkelen ti apoy iti ngato ti pagtaengan da.
Kuna na nga iti dayta a gundaway ket agid-idda daytoy ken apaman a naipakaammo ti asawa na ti mapaspasamak ket insigida a nagtaray a rimuar.
Inbatad na nga awan pulos ti nasalbar da a gamitda karaman ti kwarta da isut gapuna a saanna nga ammo ti panunuten na no kasanu da manen a mangrugi kalpasan ti pannakauram ti balayda.
Inpakaammo ni Buduan a tallo a pamilya ti agnanaed iti balay no sadinno a na-extensionan daytoy ti namindua a daras.
Agpapan ita ket saan pay a masinunuo ni Mr. Buduan no ania ti namonganayan iti uram ken iyur-uray da ti resulta ti imbestigasyon ti Bureau of Fire Protection.
Kabayatanna, inpasigurado ni Brgy. Chairman Dromar Orcia iti Barangay Corocor iti ili ti Bacarra a mangipaay da iti Brgy. Council na ti tulong pinansyal para iti Pamilya Buduan kalpasan a napukawan dagitoy ti pagtaengan.
Malaksid iti tulong pinansyal ket adda pay dagiti nagkari a kabarangayan da a mangipaay kadagiti badbado gapu ta awan pulos ti nasalbar a gamit ti pamilya Buduan.
