LAOAG CITY – Inbatad ni Police Capt. Edwardo Santos, ti chief of police iti ili ti Pagudpud a naiget ti panagbanbantay da iti tallo a sitio iti Barangay Saud iti ili ti Pagudpud.
Daytoy ket kalpasan a nakumpirmaran a positibo ti covid-19 ti maysa a residente iti nasao a barangay.
Karaman kadagiti nailockdown a sitio iti nasao a barangay ket ti Maligaya, Kamayeng ken Jupiter.
Kabayatanna, inbaga ni Santos nga agtultuloy pay laeng ti maisaysayangkat a contact tracing kadagiti possible a nakapulapol ti pasyente a taga Barangay Saud iti nasao nga ili.
Inpakaammo pay ni Santos a gapu iti pannailockdown dagiti tallo a sitio ket malimitaran dagiti mabalin a rumuar ken masapol a mangala da nga umuna ti quarantine pass iti barangay sakbay a mapalubusan da a rumuar.
Innayon na a mapalubusan laeng a rumuar ti maysa a residente no emergency, mapan aggatang kadagiti kasapulan da ken dadduma pay a napapateg nga aramiden da iti ruwar ti barangay.
Kuna na pay a mapalubusan latta dagiti mayat a mapan sumrek iti nasao a barangay ngem marigatan danton a makaruwar.
Kabayatanna, inbaga ni Santos a ti pamilya ti nagpositibo ti covid-19 ket saanda pulosen a makarwar iti pagtaengan da ken maidanun lattan kadakuada dagiti amin a kasapulan da.
