LAOAG CITY – Nakaawiden da Mrs. Glenda Sahagun ken ti asawa na kalpasan ti idadalan da iti quarantine iti arko iti ili ti Badoc.
Kuna na nga agdiretso da nga umuna iti rural health unit sakbay da a makaawid iti pagtaengan da iti Brgy. Nagpatpatan iti ili ti Solsona.
Segun kenni Sahagun, no bilang maiquarantine da iti RHU ket ikiddaw na ti panagquarantine da laengen iti pagtaengan da.
Inbatad na nga awan a pulos ti senyales ti COVID-19 kadakuada ken mamitlo iti kada aldaw ti panangkita kadakuada dagiti barangay health worker iti ili ti Badoc.
Naragsakan ni Sahagun iti panagawidda iti asawa na iti ili ti Solsona.
Kabayatanna, inpakaammo ni Miraflor Vallangca, OFW idiay Hongkong, a nakaawid metten iti Brgy. Bagbago nupay intono Huebes pay laeng kuma a malpas ti quarantine na iti ili ti Badoc.
Inbatad ni Vallangca a no mabalbalin ket ag-home quarantine daytoy.
Awan pay ti koordinasyon na kadagiti opisyal iti ili ti Solsona para ti pannakaiyawid na.
Innayon na a napintas ti pannakataripato da iti arko iti ili ti Badoc babaen dagiti frontliners.
iti mainaig a damag, kinumpirmaran ni Dr. Ruth de Lara, municipal health officer iti ili ti Solsona nga ayaban da dagiti barangay chairman a mapan mangsukon kadagiti tallo a taga Solsona a nagtalinaed iti arko iti ili ti Badoc.
Kuna na a ni Vallangca ket maiyawid ken agtalinaed iti maysa nga aldaw iti barangay.
Segun kenni Dr. de Lara, asymptomatic dagiti maseknan wenno awanan da ti senyales ti COVID-19.
kabayatanna, agtalinaed iti 14 nga aldaw ni Resty Domingo, OFW idiay Qatar, residente iti Brgy. San Esteban iti ili ti Dingras iti arko iti ili ti Badoc kas paset ti quarantine procedures.
Kuna na a simmangpet laeng ditoy Pilipinas idi Abril 10 ken simmangpet ditoy probinsya iti parbangon idi Domingo.
Inbatad ni Domingo, nga adda pay ti certificate na nga aghome quarantine.
Inlawlawag na a simmangpet gapu ta nalpasen ti kontrata na idiay Qatar.
Ileppas ni Domingo ti 14-day quarantine iti arko iti ili ti Badoc.
Mainaig iti daytoy, nasayaat met ti sitwasyon na idi adda iti Qatar gapu ta saan a rumrumwar iti pagserserbian na a pagtaengan ken awan ti day off na.
Kabayatanna, adda pay ti dua a kaprobinsyaan ti nagtalinaed iti border iti ili ti Badoc.
