LAOAG CITY – Maiyuswat ti naun-uneg nga imbestigasyon babaen kadagiti kameng ti Philippine National Police ken Lokal a gobierno ti ili ti Vintar iti maigarup a pannakailako dagiti feeds nga adda iti bodego ti Agriculture office iti nasao nga ili.
Daytoy ti inpakaammo ni Mayor Richard De Gala iti nasao nga ili.
Immuna iti daytoy, inpakaammo ni De Gala nga idi martes ket adda ti nagreport iti opisina na seknan iti maipagarup a pannakailako dagiti feeds iti maysa nga establisyimento nu sadino a ti mismo a nakailuganan dagitoy ket ti pick up ti agriculture office.
Inbatad na a basar pay iti naidanon nga impormasyon kenkuana, namintallo a daras a nagsubli-subli iti estabaliyimento ti lugan a nagidiskarga ti sinako a feeds ken arig nga agpapaapura ti nagimandar.
Innayun na nga inbagad ti nagreport a basar iti panagsaludsod daytoy iti establisyimento ket rumrumuar nga inlako dagiti maseknan dagiti feeds.
Kuna ni De Gala nga apaman a naamoan na daytoy ket Dagus nga inkamang na iti Philippine National Police iti nasao nga ili.
Inpakaammo na a dagus a nacheck ti cctv ken dita a nakita ken positibo a nabunag dagiti feeds manipod iti bodega.
Kuna na a nakita iti video a dagiti estudyante nga addaan ti immersion ti namandar nga agilugan dagiti feeds rason a naikkat dagitoy iti imbestigasyon.
Innayun na a nakigtot met iti pannakairamraman ni r Patrick Suniga a dua bulan pay laeng nga agtrabtrabaho ken naduktalan na manipod iti daytoy nga ado ti maobobserbaran na a pasamak iti uneg ti opisina da ken nakasagana a mangited ti testimonya.
Mainaig iti daytoy, kuna ni Police Capt. Roy Manuel Ordonio, ti chief of police iti ili ti Vintar karaman kadagiti posible a mapilaan ti reklamo a qualified theft ket ti permanent employee a ni Oliver agbayani, Ramon Agbayani, agtagikua ti establiysimento a nakailakoan dagiti feeds ken ni Doctor Myrna Simon a Municipal Agriculturist.
Naamoan a 36 sacks dagiti nailako a feeds nu sadino a 21 ti para iti baboy idinto a 15 dagiti para lames.
