LAOAG CITY – Nasugatan dagiti tallo nga indibidual pakairamanan ti maysa a menor de edad kalpasan ti panagdinnungpar ti tricycle a nagluganan da ken maysa a Toyota Fortuner iti Barangay 10, San Vicente iti ili ti Bacarra.
Ti driver ti tricycle ket agtawen ti 56, naasawaan, idinto a dagiti nakalugan ket agtawen ti 51 a babai ken ti agtawen ti siyam nga ubing a lalaki, agpapada a residente iti Barangay 35, Pipias iti nasao nga ili.
Inturong met ti agtawen ti agtawen ti 59 ti Toyota Fortuner, naasawaan, maysa a mannalon ken residente iti Barangay 22, Bacarra.
Basar iti report, agturong iti abagatan ti Toyota Fortuner ken dumalan iti intersection road iti nasao a barangay idinto a ti tricycle ket agpadaya a nangitunda ti panagdingnungpar dagitoy.
Gapo iti daytoy, nagsagaba ti driver ti tricycle ti sugat iti akin-kannigid nga ima na idinto a ti nakalugan a babai ket nasugatan ti ulo na pakairamaman ti ubing.
Dagus met a naitaray iti Gov. Roque Ablan Sr. Memorial Hospital ditoy ciudad ti Laoag dagiti biktima para iti pannakataming dagitoy.
