LAOAG CITY – Agtultuloy ti imbestigasyon dagiti otoridad iti napasamak a desgrasya iti sangoanan a mismo ti Iceplant a paset ti Barangay 19 iti ili ti San Nicolas.
Binigbig ti Police Major Joseph Baltazar, ti chief of police ti PNP-San Nicolas ti driver ti kotse a ni Jesril Casalola, agtawen ti 18 ken residente iti Barangay 24 ditoy ciudad ti Laoag idinto a dagiti dua a kakadua na ket isuda Chantily Carmel Fiesta, 19, residente iti Brgy. Nangalisan-Bken Daniel Afable y Juan, 21, ken residente iti Brgy. 14, ditoy met laeng ciudad.
Iti imbestigasyon, kuna ni Baltazar a dagiti tallo a biktima ket naggapo iti ciudad ti Batac gapo ta adda ti napan da intulod a pagayam da.
Kunana nga iti panagpapa-amyanan a direksyon dagiti biktima partikular iti kurbaan ket napukawan ti kontrol ti driver no sadinno ket naidungpar iti puon ti kayo.
Inbatad na a makitkita da a napaspas ti panagpataray ti driver a puon ti pannakapukaw na ti kontrol.
Dagus met a naitaray iti Mariano Marcos Memorial Hospital and Medical Center iti ciudad ti biktima para iti pannakataming dagitoy.
Agpapan maisursurat ti damag ket saan a kayat ti maysa kadagiti biktima nga addaan ti puot ti sumungbat iti saludsod dagiti otoridad.
Kabayatanna, saan pay a makumpirmaran ni Baltazar no adda ti kalumlumba ti kotse a maysa a close van.
