LAOAG CITY – Kinumpirmaran ni Police Major Joseph Tayaban, ti Chief of Police ti Philippine National Police iti ili ti Badoc nga adda tallo a lallaki ti natiliw da gapu iti panagpeke da ti resulta ti RT-PCR Test iti Badoc Border Control.
Segun kenkuana, nabigbig dagiti maseknan a da Nestor Austria y Regalado, agtawen ti 30, naasawaan, delivery man ken residente ti 219 Sikat St., San Miguel idiay Manila; Victor Docena y Diaz Santos, agtawen ti 28, naasawaan, driver ken residente ti 109 Camatchili St. Area 7B, Brgy. Pasong Tamo Luzon Ave. Quezon City ken ni Chucky Franz Adiaton y Vacunawa, agtawen ti 35, naasawaan, delivery man ken residente ti Brgy. 1003 Arlegui St., Quiapo Manila.
Inbatad na a bayat nga agbanbantay dagiti kameng ti 2nd INPMFC 1st platoon nga idadauloan ni Police Lieutenant William Lu Sotelo iti South Badoc Border Control ket naduktalan da a peke ti inprisentar dagiti maseknan nga RT-PCR Test result a maipagarup nga inyisyu ti Sta. Ana Hospital, 2629 New Panaderos St. Ana, Manila.
Inlawlawag na a gapu iti daytoy ket inpaberipikar dagiti otoridad kadagiti personnel ti Office of the Barangay Affairs wenno OBA pakairaman ti Duty Nurse ti South Border Control babaen iti QR Code Scanning.
Innayon na a sumango dagiti lallaki ti kaso gapu iti panagsalungasing da ti Article 174 of RPC iti Section 27 Falsication of Public Documents.
