LAOAG CITY – Natiliw dagiti tallo nga indibidwal gapo iti iligal a panagsusugal da idiay Barangay 15, San Jose iti ili ti San Nicolas.
Nabigbig dagitoy a da Eric Caraang, agtawen ti 43, awanan ti asawa, aggatgatang ti botelya ken residente iti Brgy 22, San Guillermo iti ili ti San Nicolas; Jocelyn Gala, agtawen ti 51, miembro ti 4Ps ken residente iti Brgy 15, San Nicolas ken ni Marissa delos Santos, agtawen ti 52, aglaklako ken residente iti Barangay 4, San Bartolome iti nasao met laeng nga ili.
Naamoan a naaktuan dagiti otoridad nga agay-ayam dagiti suspek ti tong-it ken nakumpiskar ti maysa a set ti baraha, 170 a pisos, tallo a plastic a tugaw, lamisaan ken dagiti personal a kwarta dagiti maseknan.
Segun kenni Gala, pagliwliwalan da laeng ti panagay-ayam nangruna no mabannog da ken saan nga inaldaw nga ubra da.
Inbatad na a gapo iti daytoy, nakasagana a mangsango iti reklamo a maipila kontra kadakuada ken no siasinno ti mangabak ket agilibre ti meryenda.
Kuna met ni Police Major Paul Benedict Parado, ti chief of police ti PNP-San Nicolas, isagsagana dan ti kaso a maipila kontra kadagiti nasao nga indibidwal.
Innayon na a natiliw dagiti suspek kalpasan ti naawat da nga impormasyon a masansan nga agsusugal iti nasao a lugar.
