LAOAG CITY – Kinumpirmaran ni Dr. Christina Pingao, ti Municipal Health Officer iti ili ti Currimao a napunnon dagiti tallo nga Isolation Facilities iti nasao nga ili.
Daytoy ket gapu iti kellaat a panagngato ti bilang dagiti nakaptan ti COVID-19 virus iti ili ti Currimao.
Inbatad ni Doctor Pingao nga iti agdama ket adda ti 35 a dumaldalan ti 14-Day Quarantine period no sadinno a 15 ditoy ket adda iti Tapao-Tigui Isolation Facility, 15 ti adda iti Ernesto G. Go Mega Complex idinto 3 ti adda iti Mothering Center pakairamanan dagiti 2 nga iti saggaysa a container van.
Inlawlawagna a dagiti dandani malpasen nga agquarantine ket pinalubusanna nga ituloyda ti ag-quarantine iti balay da.
Kunana nga adda ti pinirmaan dagiti maseknan a waiver a mangipaneknek a dagitoy ket agtulnog a manglippas iti nabatbati pay nga aldaw a panag-quarantine da iti uneg ti pagtaenganda.
Inpalgakna a nakailanad pay iti waiver a naited kadagiti maseknan a nakasagana dagitoy nga agsungbat no bilang mapaneknekan a dagitoy ket nagsalungasing kadagiti pagalagadan.
Innayonna nga adda metten ti koordinasionda ken ni Dr. Rina Corpuz, mangidadaulo kadagiti Quarantine Facilities ditoy probinsia a dagiti sumangpetto pay nga ag-quarantine iti ili da ket mapan iti DPWH Isolation Facility iti Siudad ti Laoag.
