LAOAG CITY – Napalaos ti ragsak ni Barangay Chairman Elviro Agoo iti Barangay Davila iti ili ti Pasuquin gapo iti naisayangkat a tree planting.
Segun kenni Agoo, pakaydayawan ti barangay da gapo ta kanayun a mapili ti Barangay davila kadagiti pakaisaysayangkatan ti tree planting activity.
Ti nasao nga aktibidad ket indaulwan ti Kapisanan ng mga Brodkaster ng Pilipinas (KBP)- Ilocos Norte Chapter ken kabinnulig na ti Dept. of Environment and Natural Resources (DENR).
Malaksid iti KBP, nakipartisipar pay dagiti nagduduma nga organisasyon ken club, coastal guards ken BFP.
Umabot ti tallo ribo a puon ti bakawan ti naimula iti nasao a barangay.
Kabayatanna, maragsakan ni Mrs. Cely Paz, ti KBP-President ditoy Ilocos Norte iti kooperasyon iti nagduduma a kameng ti media ken sumagmamano a non-government organization iti Simultaneous KBP Brodcastreeing.
Segun kenni Paz, maysa ti KBP-Ilocos Norte Chapter kadagiti pito a KBP chapters ditoy pagilyan ti pinaka-aktibo.
Inbatad na a dagiti naimula a puon ti bakawan ket maysan to kadagiti makatulong wenno mangprotehir kadagiti residente iti nasao a barangay no bilang dumakkel ti lebel ti danom.
Naamoan a narigat ti dalan nga agturong iti nasao a lugar a nagmulaan da ngem saan a lapped daytoy tapno saan a maiyuswat ti tree planting.
