LAOAG CITY – Maproblemaaan dagiti mangalap iti Barangay 32-A La Paz ditoy ciudad ti Laoag gapu iti in-inut a pannakatay dagiti pupok da nga ikan.
Segun ken ni Mr. Mann Dela Cruz, maysa mangalap, pagam-amkanda a matay amin dagiti taraken da nga ikan gapu ta daytoy laeng ti pagbibiagan da.
Patien ni Dela Cruz a matmatay dagiti taraken da gapu iti maisaysayangkat a quarry operation iti kabangibang da a barangay.
Kunana nga idi rugrugi ti quarry operation, saan met pay a natay dagiti ikan ngem apaman a limmibeg ti danom iti pagipup-pupukan da ket ditoy a nangrugin nga adda natay gapu ta mapitpitakan dagiti ikan.
Innayonna a daytoy ti umuna a gundaway a napasamak kadagiti taraken da nga ikan ken iti agdama umaboten iti nasurok sangagasut a pedaso ti ikan a pupok ni Dela Cruz ti natay a pakairamanan ditoy ti malaga ken bangus.
Inpakaammu na a dagiti taraken da nga ikan ket aggapu pay iti Panggasinan ken ginatang da daytoy ti 17 a pisos kada pedaso.
Iti pakabuklan, addaan dagiti mangalap iti Metro Lapaz ti nasurok 6000 a pupok nga ikan.
Gapu iti daytoy nagpanawagan ni Dela Cruz iti gobierno a sulosyunan ti problema da a mangalap iti Metro Lapaz.
Kabayatannan ikagkagumaan met a maala ti Bombo Radyo News Team ti palawag ti kompaniya a mangisaysayangkat ti quarry operation agraman ti maseknan nga ahensya ti gobierno.
