LAOAG CITY – Nangirubuat ti Food and Drug Administration ti maysa a task force a mangtutok iti panangarisit kadagiti produkto a borderline.
Inbatad ni Food and Drug Administration Director General Samuel Zacate a ti Task Force Diomede ket gagemna a tutukan ti panag-streamline ti proseso ti panangtingiting kadagiti borderline a produkto wenno dagiti produkto a saan a nalawag a naarisit.
Naammoan a dagiti produkto a nakarehistro iti Food and Drug Administration ket naarisit kas agas, device, cosmetics, sambahayan wenno urban hazardous substance ken makan.
Gapu iti daytoy, kuna ni Zacate a ti posibilidad ti baro a produkto a sumsumrek iti merkado iti pagilian ket makissayan.
Innayonna a ti task force ket paset ti inobasion ti ahensia tapno makabaelanna kagiddan ti moderno a teknolohia.
