LAOAG CITY – Inlawlawag ni Mr. Raffy Plaza, maysa a Tattoo Artist ditoy siudad ti Laoag no apay nga awan pay ti tattoo-na iti baet nga addan ti sumurok lima a tawenen a trabahona daytoy.
Segun kenkuana, saan a gapu ta maysa isuna a Tattoo Artist ket rumbeng met nga adda ti tattoo-na.
Nupay kasta, inbatadna a kalikagumna nga agpa-tattoo iti bukudna a disenio ken kayatna a saan nga agbabawi apaman nga agpa-tattoo gapu ta saanton a maikkat daytoy.
Inpasingkedna nga amin a maus-usar a ramit ken equipment ket baro ken nadalos sakbay a mausar tapno maipasigurado met laeng ti kinatalged dagiti agpa-tattoo kenkuana.
Mainaig iti daytoy, inpakaammo ni Plaza nga ad-adda a naasa ti talentona iti pannakipasetna kadagiti poster making competition idi agbasbasa pay laeng daytoy.
Innayonna nga agtawen pay laeng daytoy ti dua ket mahilig daytoyen nga ag-drawing banag a nausarna iti panagbalinna ita kas Tattoo Artist.
Kabayatanna, naammoan a masapol a dagiti nagpa-tattoo ket saan nga agpuypuyat gapu ta adda dagiti posibilidad nga agdara pay laeng daytoy.
