LAOAG CITY – Patien ni dati a Congressman Rudy Fariñas a binutbuteng dagiti pulis dagiti kakadua da iti ili ti Piddig ken Sarrat gapo iti maipagarop a panaggatang ti butos.
Inpetteng na nga awan ti karbengan ti siasinno man a sumrek lattan iti pagtaengan ti maysa a tao ken agsaludsod no adda ti kwarta da nga isu ti maus-usar a vote buying.
Rakurak na daytoy gapo iti maipagarop a panagserrek ti Mayor iti ili ti Piddig ken pulis iti pagtaengan dagiti coordinators ti grupo ken iti kapitan da iti parbangon.
Segun kenkuana, adda ti insentibo dagiti kakadua da gapo ta dagitoy ti agserbi kas poll watchers para iti eleksyon intono bigat.
Kwinestyunaran na pay ti akusasyon nga adda ti mapaspasamak a vote buying gapo ta awan met ti pamaneknek ken ti kwarta ket adda met a mismo iti pagtaengan dagiti kakadua da.
Mainaig iti daytoy, kuna ni Atty. Fariñas a madlaw nga scripted ti napasamak iti ili ti Sarrat no sadinno ket adda ti maipagarop nga innala ti pulis a kakadua da ken inpan da a mismo iti police station.
Inbatad na mabalin a binutbuteng dagiti pulis dagiti kakadua da iti nasao nga ili ken pinagparang da a boluntaryo a simmuko dagiti maseknan gapo iti vote buying.
Gapo iti daytoy, dagus a nagturong iti istasyon ti pulisya ni Atty. Jason Perera ken sinaludsod na no anya ti kaso dagiti kakadua da nga innala da, ngem maipagarop nga awan met ti maisungbat dagiti pulis.
Inpalgak na a nakakadkadlaw nga scripted wenno naplano ti napasamak gapo ta maipagarop nga adda pay ti naisagana a dokumento wenno acknowledgement receipt ken pagpirmaen da dagitoy.
Innayon na a dagus na a kinontra ti inbaga dagiti pulis a maipagarop nga ited da laeng ti kwarta dagiti coordinators da intono malpas ti eleksyon.
Kabayatanna, desidido ti abogado a mangipila ti reklamo kontra kadagiti pulis.
