LAOAG CITY – Kalikagom ti lokala a gobierno ditoy siudad ti Laoag nga agbalin a back-to-back champion iti mapaspasangasangan a Region 1 Athletics Association Meet (R1AA) 2025.
Daytoy ti inpakaammo ni Mr. Hipolito Hipolito Salva Jr., mangidadaulo ti Local and Sports Development office ditoy siudad.
Segun kenkuana, manipud idi Nobiembre 15 ket nangrugin ti panagtalinaed da kadagiti nagduduma a pagadalan ditoy siudad a pakairamanan ti Ilocos Norte College of Arts and Trades, Rodolfo Fariñas Science High School, Ilocos Norte National High School, Suyo Elementary School, Casili ken Gabaldon Elementary School.
Innayoanna a babaen iti daytoy wagas ket tapno marugyanan dagiti atleta ken trainers ti naiget a panagsanay kadagiti nagduduma a tay-ak ti sports a pakisalipanda.
Inpettengna nga adda ti manamnama a nasurok 700 nga indibidual ti mangbukel iti Team Laoag idinto a sumurok-kumurang 500 kadagitoy ket dagiti atleta.
Inrakurakna a 28 nga ay-ayam ti pakipartisiparan da ita a tawen, 4 ditoy ket ti baro a sports a pakilabanan da kas iti wushu, wrestling, pinsat-silak ken boxing.
Kunana pay a malaksid kadagiti local trainers ket nangalada pay kadgaiti national trainers a mangsanay kadagiti ubbing.
Kabayatanna, namnamaen ni Salva a babaen iti naiget a panagsagana ti team Laoag ket magun-od da manen ti kampionato.
Iti agdama, manamnama a maiwayat Region 1 Athletics Association Meet iti probinsiya ti La Union inton Marso 2025.
