LAOAG CITY – Agpada a nagballigi iti maysa a beauty contest da Priscilla Meirelles ken Teresa Loyzaga.
Napadayawan kas Noble Queen Nations ni Meirelles idinto a Noble Queen Worldwide met ni Loyzaga iti naiyuswat a Noble Queen of the Universe Ltd. Inc.
Ti Noble Queen of the Universe Ltd. Inc. ket maysa nga international pageant organization a naisayangkat ditoy pagilian kageddan ti maikanem nga anibersarioda.
Iti online account ni Meirelles ket napalaos ti kinaragsakda ken maibilang a maysa a pammadayaw ti naawat ti beauty pageant crown.
Nagbalin a Miss Globe International isuna idi 2003 ken Miss Earth idi 2004 idinto nga inbatad ti agtawen iti 59 a ni Loyzaga a ti pannakagun-odna ti titulo ket maysa a natungpal nga arapaapna.
Kunana nga iti baet ti tawenna ket naisuotna pay laeng ti nasao a korona.
