LAOAG CITY – Kalikagum ni Sangguniang Panlungsod Member RJ Fariñas nga agsurat iti Philippine National Police – Traffic Division ditoy siudad ti Laoag tapno tiliwen dagiti lugan nga adda iti paset ti Panganiban Street gapu ta makaitunda daytoy ti nairut a trapiko.
Segun kenkuana, dagiti maseknan a lugan nga agi-parking wenno adda iti terminal iti nasao a kalsada ket maikanniwas iti maipatpatungpal a Traffic Ordinance banag a masapol laeng a maipakat ti linteg-trapiko tapno saan a makaabbeng dagitoy kadagiti dumalyasat a motorista.
Mainaig iti daytoy, inlawlawag ni Ms. Virgie Pascual, ti Manager ti Modernized Jeepney iti Laoag-Batac-Paoay a temporario laeng ti panag-terminal-da iti nasao a kalsada ngem saanna a masinunuo no inton ano dagitoy nga umakar.
Inpalgakna nga umannugotda a mapatalaw iti agdama a terminal-da laketdi sapasap ti pannakaipatungpalna kadakuada tapno awan ti mapabpaboran.
Immuna iti daytoy, basar iti obserbasion ti News Team ti Bombo Radyo Laoag ket adda ti tallo a modern jeep ti nakapila nga agur-uray kadagiti pasahero no sadino apaman a mapno ti umuna a modern jeep ket tawaganda ti kaduada nga isu ti mangsukat iti nagkarga a modern jeep.
