LAOAG CITY – Umawat ti livelihood starter kits dagiti iskolar ti Technical Education and Skills Development Authority ditoy Ilocos Norte nga agturpos iti panagsanay iti produksion ti tinapay ken pastry.
Segun ken ni Mrs. Socorro Galanto, Provincial Directir ti Technical Education and Skills Development Authority, saan a bumaba iti 15 ti dumalan iti National Certificate 2 on bread and pastry production iti uneg ti 10 agingga iti 20 nga aldaw a panagsanay a makagun-od kadagiti starter kits.
Makaawat dagiti 15 a benepisiario inton bigat iti maysa nga oven ken maysa nga electric mixer a mabalinda nga usaren kalpasan ti panagsanayda iti Technical Education and Skills Development Authority – Accredited Ilocos Norte College of Arts and Trades.
Kinuna ni Galanto a namnamaenda pay ti pannakaited dagiti toolkit a buklen dagiti assembly night lights ken post lamp para iti 40 a benepisiario a nagsanay iti solar installation ken 60 a benepisiario para iti organic agriculture iti Banna Provincial Training Center.
Idi 2023, nangilatang ti Technical Education and Skills Development Authority iti 8,529 nga scholarship para iti Ilocos Norte.
Naammoan nga adda ti 5,644 nga iskolar ti nakaturpos iti nagdumaduma a panagsanay idinto a manamnama a makaturpos dagiti nabati a trainees sakbay ti ngudo ti Marso ita a tawen.
Kabayatanna, dagiti basic course nga ipapaay ti Technical Education and Skills Development Authority ket ti National Certificate (NC) ket karaman ti automotive servicing NCI, cookery NCII, dressmaking NCII ken electrical installation and maintenance NCII.
