LAOAG CITY – Inbatad ni Atty. Kidd Castro, maysa a private lawyer ditoy probinsya a saan a maibilang nga ebidensya tapno mabalud dagiti personalidad a nainaganan iti manarimaan nga imbestigasyon ti Senado mainaig kadagiti palpak, maanomalya Ken ghost flood control projects.
Inlawlawag na a pudno a nakaad-adon dagiti naibutaktak nga impormasyon iti Senate hearing babaen kadagiti resource persons ngem saan a maibilang dagitoy kas admissible evidence iti korte.
Inrakurak na a ti nadagsen koma a kaso a maipataw kadagiti sumagmamano nga opisyal ti gobierno ket ti plunder gapu ta daytoy ket panagtakaw ti Pondo ti umili a minilyon a pisos.
Nupay kasta, dagiti impormasyon nga inbutaktak dagiti testigo wenno resource persons ket maibilang nga extrajudicial wenno out of court ti testimonya gapu ta saan a korte ti Senado.
Inpetteng na a no kayat a mabalud ti maysa nga indibidual ket masapol a dumalan iti judicial proceedings babaen ti normal a panagpila ti reklamo iti Ombudsman Ken desisyonan ti Sandiganbayan ti kaso.
Kuna na a no kunviktaran ti Sandiganbayan dagiti karaman a personalidad kadagiti maanomalya a proyekto ti gobierno ken awan ti panagapela da ken sangwen dan ti sentensysa da ket isunto paylaeng ti pannakaikonsiderar nga adda ti liability da iti sangsangwen da nga isyu.
Inyarig ni Atty. Castro ti napasamak ken ni Pork Barrel Queen Janet Lim-Napoles no sadinno a saan a nabalud gapu iti Senate inquiry no di ket gapu iti idadalan na ti judicial proceeding.
Mainaig iti daytoy, kuna ni Castro a ti laengen iyuray ti kaadoan a Pilipino ket no adda ti mapagsungbat kadagiti naruay nga opisyal ti gobierno a maitudtudo nga adda ti pannakainaig na kadagiti maanomalya a proyekto babaen ti pormal a pannakaipila kadakuada ti reklamo iti Ombudsman Ken desisyonan ti Sandiganbayan.
Innayon na a no agpatingga laeng ti Senate hearing wenno Senate inquiry ket Awan serbina.
