LAOAG CITY – Nangiyuswat ti nalawa a tignay protesta dagiti naruay nga umili iti 50 nga estado ti Estados Unidos kontra ken ni Presidente Donald Trump ken ni Elon Musk no sadinno a dagiti kangrunaan a pakaipatpatungpalan na ket iti state capitol, federal buildings, congressional offices, Social Security headquarters, parks ken city halls iti intero nga Amerika.
Uray iti dadduma a paset ti lubong ket adda met dagiti maiyus-uswat a tignay protesta kontra kada Trump.
Daytoy ket inorganisar ti pro-democracy movement kas sungbat iti maipagarop nga “hostile takeover” ken panangatake iti American rights ken freedom.
Panawagan dagitoy nga isardengen ti inawagan da a ‘billionaire takeover’, panagraira ti korapsyon, panangkissay ti federal funds para iti Medicaid, Social Security ken dadduma pay a programa, ken ileppasen ti panangatake kadagiti immigrants ken ‘trans’.
Nupay kasta, immunan a tinagibassit ti kampo ni Trump dagitoy a panawagan ken inkarina nga agtultuloy dagiti programa ti agdama nga administrasyon.
