LAOAG CITY – In-renew wenno inpabaro ti Sangguniang Panlungsod ditoy siudad ti Laoag ti Timpuyog Referral System iti Laoag City General Hospital kadagiti nagduduma nga ospital ditoy probinsia.
Segun iti Chairman ti Committee on Health, daytoy ket maysa nga addang tapno maipaay ti kasapulan dagiti pasiente a saan a kabaelan nga ipaay ti ospital a nakaitarayanna.
Inlawlawagna nga iti Timpuyog Referral System ket rumbeng a tinawen a maipabaro tapno agtultuloy ti koordinasion ken panagkikinnammayet dagiti ospital a mangipaay ti napinpintas a serbisio medikal.
Mainaig iti daytoy, kalikagum ti konseho nga iti panakai-renew-na daytoy ita a tawen ket maiplastar met ti pannakaipatungpalna.
Basar kadagiti opisial nga adda dagiti maipadpadanon kadakuada a kaso ti maysa a pasiente a naitaray iti Mariano Marcos Memorial Hospital and Medical Center iti siudad ti Batac ngem saanda nga akseptaren gapu ta awan ti naawatda a tawag wenno referral manipud iti ospital a naggapoanna.
Kabayatanna, gagem ti Sangguniang Panlungsod a kasapulan a kitaen a nasaayat daytoy gapu ta dagiti pasiente ti maapektaran no saan a masurot a naimbag ti proseso ti programa.
