LAOAG CITY – Inbinglay ni Rep. Janette Garin ti tinawen a mapaspastrek ti kompanya a kukua ti pamilya Discaya, basar kadagiti dokumento a naisumitir iti Securities and Exchange Commission (SEC).
Segun ken ni Garin, madlaw ti dakkel a nagngatoan ti napastrek dagiti nasao a kompanya sipud pay idi 2016.
Ti presentasyon ket paset ti nalawlawa a panangtingiting iti pinansyal a garaw dagiti negosyo ti agasawa a Discaya, nga iti agdama ket maim-imbestigar mainaig kadagiti alegasyon a possible nga adda ti irregularidad iti operasyon da.
Nagmosyon pay ni Iloilo Rep. Janette Garin nga obligaren ti Discaya group of companies a mangisumitir ti kumpleto a listaan dagiti proyekto nga inpatungpal da iti Western Visayas sipud idi 2015.
Daytoy ket paset ti nalawlawa a pannakaimbestigar iti maipagarop nga iregularidad kadagiti kontrata dagiti kompanya a kukua ti pamilya Discaya.
Naamoan nga adda dagiti proyekto iti Iloilo a nakurang iti documentation, addaan ti agduma a contractor records, ken awan ti transparency boards iti site.
Sumagmamano kadagiti kumpanya a karaman iti daytoy ket ti St. Gerrard Construction, St. Matthew General Contractor, ken dadduma pay a paset ti kumpanya nti Discaya group.
Gagem ti mosyon ni Garin a maestablisar no adda ti pattern ti anomalya kadagiti proyekto iti rehiyon, aglalo ket adda dagiti report a kimmaro ti mapaspasaran a layos iti sumagmamano a barangay kalpasan ti implementasyon ti sumagmamano a flood mitigation structures.
