LAOAG CITY – Naragsak nga inpakaammo ni Engr. Shiela Opelac, mangidadaulo ti City Agriculture Office a napintas ti nagbalin a pamastrekan ti Todamax Vegetable Garden and Flowering Plants a masarakan iti Barangay 29 Sto. Tomas ditoy siudad ti Laoag.
Inbatadna a kalpasan a nagmula ti Todomax Farmers Association ket insigida a nagpanunot dagitoy ti alternatibo a wagas tapno masustinir ti kinapintas daytoy.
Inlawlawagna a nagmula pay ti Todomax Farmers Association ti ad-adu a klase ti nateng tapno pagbalinen daytoy a “pick and pay” a dakkel a nakatulong kadakuada tapno nayon nga agserbi iti pamiliada.
Kunana a tapno ad-adda pay a makagutigotda ti mapan agturong iti baro a tourist attraction ket balbaliwanda dagiti imulmulada.
Maipalagip a nalukatan daytoy iti publiko iti kallabes ken agpapan ita ket awan pay ti naiyetnag nga entrance fee.
Naammoan nga agarup 3,000 square meters ti kalawa ti nakaimulaan dagiti nagduduma a klase ti nateng ken sabsabong.
