LAOAG CITY – Maibilang a baro a tourist attraction ditoy siudad ti Laoag ti Todamax Vegetable Garden ken Flowering Plants a masarakan iti Brgy. 29, Sto. Tomas ditoy siudad.
Segun ken ni Mr. Leovigildo Sacramento, Presidente ti Farmers Association, umad-adu ti bilang dagiti bumisbisita iti nasao a lugar nangruna ita nga holiday season.
Inbatadna a dagiti agturturong iti tourist attraction ket manipud iti ili ti Pasuquin, Bangui, Dingras ken dadduma pay.
Inlawlawagna nga awan pay ti masingsingir nga entrance fee gapu ta manarimaan pay laeng ti pannakaiproseso ti pannakaputar ti ordinansa.
Gapu iti daytoy, kunana a tapno adda ti pagkautanda para iti panangmentenar iti kinapintas ken kinadalos iti aglawlaw ti Todamax Vegetable Garden ken Flowering Plants ket nangaramidda ti donation box para kadagiti mangayat ti mangted ti tulong pinansial.
Naammoan nga agarup 3,000 square meters ti kalawa ti nakaimulaan dagiti nagduduma a klase ti natnateng kas ti parya ken ti sabsabong kas ti sunflower wenno mirasol.
Innayonna nga adda ti lima a nadutukan nga agbantay iti nasao a tourist attraction tapno mapagtalinaed ti napintas a buya daytoy.
