LAOAG CITY – Nagballigi dagiti otoridad a nangtiliw iti Barangay Tanggaoan iti ili ti Piddig ti maibilang kas Top 1 Most wanted person iti ciudad ti Baguio.
Ti akusado ket agtawen ti 34, awanan ti asawa ken residente iti Barangay Tubburan iti ili ti Bacarra.
Segun ken ni Police Lt. Rudy James Jacalne, ti chief of police iti ili ti Piddig, natiliw ti akusado babaen ti bileg ti maysa a warrant of arrest gapu iti kaso na a murder ngem nagmosyon isut gapuna a nagtennag iti homicide.
Inlawlawag na a napasamak ti kaso idi 2011 no sadinno a kabayatan ti panaggiinom ti grupo ti akusado ket adda ti napasamak a komosyon ken napatay da ti maysa a taga ciudad ti Baguio.
Inpakaammo na nga uppat a tawen a nabalud ti akusado sakbay a nakapiyansa para iti temporaryo a pannakawaya-waya na.
Innayon na a kabayatan ti pannakadengngeg ti kaso na ket saan pulos a napan nagparparang rason a naiparuk-atan ti sabali manen a warrant of arrest.
Kuna pay ni Jacalne a nabayag a nagnaed idiay Parañaque City ti akusado sakbay a nagawid ditoy probinsya nga isu metten ti pannakatiliw da.
Iti agdama, nagtalinaed ti akusado iti kustodyar ti PNP iti ili ti Piddig.
