LAOAG CITY – Inbatad ni Police Lt. Col. Rafael Lero, ti chief of police ditoy ciudad ti Laoag nga idi pay laeng 2015 a mamonmonitor ti subject ti drug buy-bust operation a naisayangkat iti Barangay Balacad ditoy ciudad.
Binigbig ni Lero ti suspek a ni Christoper Diaz, taga Barangay 20, San Matias ditoy ciudad ti Laoag.
Inbaga ni Lero nga iti naisayangkat nga operasyon ket nakakumpiskar da iti ikot ni Diaz iti 4 a sachet a naglaon ti maipagarop a shabu no sadinno a maysa ditoy ti inlako ti suspek iti maysa a pulis a nagpammarang a poseur-buyer.
Malaksid kadagiti droga ket naala pay dagiti otoridad ti sangaribo a pisos a buy-bust money.
Iti interview ti Bombo Radyo Laoag ken ni Lero, inlawlawag na a 2015 pay laeng a mamonmonitor ti suspek ngem saan da a marupaan.
Nupay kasta, iti laeng nabiit ket narupaanen dagiti intel da isut gapuna nga insayangkatan da a dagus ti operasyon.
Segun iti opisyal, ti suspek ket maysa pay a van driver ken agibibiyahe kadagiti Locally Stranded Individuals (LSIs) ngem ti kangrunaan a ranta na ket ti mapan aggatang ken agideliver ti illegal a droga, saan laeng a ditoy Ilocos Norte no di ket iti intero a rehiyon uno.
Inpakaammo pay ni Lero a ti suspek ket maibilang a Top 10 drug personality iti Regional Level.
Immunan nga inbaga ni Lero a saan da pay a maibaga no sadinno a lugar idiay Metro Manila ti pagal-alaan ti ilaklako a droga ti nasao a suspek.
Kabayatanna, inpakaammo ni Lero a ditoy ciudad ti Laoag ket bumasbassiten ti mamonmonitor da a drug personalities gapu iti agtultuloy ket umig-iget nga operasyon da kontra kadagiti addaan iti illegal nga aktibidad.
Innayon na a ti target da ket mapagbalin a drug free saan laeng a ditoy ciudad ti Laoag no di ket iti intero nga Ilocos Norte.
