LAOAG CITY – Natiliw ti Top 3 Most Wanted Person iti national level ti Highway Patrol Group (HPG) gapo iti kaso nga 8 counts ti syndicated estafa.
Nabigbig ti suspek a ni Nathaniel Patricio y Baoat, agtawen ti 43, naasawaan ken residente idiay Barangay Francisco iti ili ti Dingras, Ilocos Norte.
Balligi a natiliw daytoy babaen ti nagtitipon a pwersa ti Ilocos Norte Highway Patrol Group, Regional Intelligence Unit, IG, Intel Division HPG, RMFB1-101st MC, Solsona MPS, CIDT Ilocos Norte, ken RID PRO1.
Ti warrant of arrest ket inparuk-at ni Hon. Assisting Judge Ivan Kim B .Morales iti Regional Trial Court, 1st Judicial Region Branch 18, La Trinidad, Benguet a napetsaan ti Oktubre 3, 2015.
Segun kenni Police Chief Inspector Rufino Nuug, hepe ti HPG-Iloco Norte, aglaklako ni Patricio kadagiti lugan nga naisalda kenkuana wenno dagiti behikulo nga adda pay laeng ti orihinal nga agtagikua, ken adda pay ti interes na.
Iti agdama ket nai-turn over ni Patricio HPG Intel Division, National Headquarters, idiay Camp Crame, Quezon City.
