LAOAG CITY – Natiliw ti Top 4 Most Wanted Person ditoy probinsya kalpasan ti 11 a tawen a panaglemlemmeng ti akusado.
Ti akusado ket agtawen ti 58, awanan asawa, mannalon tubo iti Brgy. Madupayas iti ili ti Badoc ken agnanaed iti Brgy. Santa Margarita, Baggao, Cagayan.
Segun kenni Police Major Joseph Tayaban, hepe ti PNP Badoc, kadua ti PNP Badoc dagiti kameng ti Provincial Intelligence Unit iti INPPO ken nagturong da iti nasao a probinsya.
Kuna na a natiliw da ti akusado iti pagtaengan na ti Sitio Maisi iti nasao a barangay babaen ti bileg ti warrant of arrest a napetsaan ti Marso 7, 2011.
Addaan ti kaso a panagrames ti akusado ken awan ti nairekomendar a piyansa na.
Manamnama a maidatag ti akusado iti korta a naggapuam ti warrant of arrest.
