LAOAG CITY – Naarestar ti maibilang a Top 8 Wanted Person ti probinsya ti Apayao babaen ti nagtipon a pwersa ti Calanasan MPS, Apayao Police Provincial Office ken ti PNP Pinili.
Nabigbig ti akusado a ni Emerson Calapati, 32, addaan ti live-in partner, karpintero, tubo iti Sta. Filomena, Calanasan, Apayao ngem agdama nga agnanaed iti Brgy. Gulpeng ken Brgy. Pagdilao iti ili a Pinili.
Sumagsango ni Calapati iti kaso a Double Frustrated Homicide ken Use of Illegal Possession of Firearms gapu ta bayat ti kaadda na iti kabanbantayan ti Apayao, ket maipagarup a pinaltogan na dagiti dua nga armado a lallaki idi 2009.
Awan ti nairekomendar a piyasa na para koma iti temporaryo a pannakawaya-waya na.
Iti agdama, nagtalinaed iti kustodyar ti PNP Pinili ni Calapati ken manamnama a maibyahe iti probinsya ti Apayao para iti pannakaiyawat iti korte a naggapwan ti warrant of arrest.
