LAOAG CITY – Binigbig ti TasteAtlas ti torta a tarong kas maikadua a kaimasan a laok ti itlog iti intero a lubong nga addaan ti rating a 4.4 iti 5.
Nailadawan ti torta a tarong kas maysa a simple a taraon dagiti Pilipino a naaramid iti binatil nga itlog a kaarngi ti maysa a naluto nga omelet.
Dinayaw ti nalaka a presiona ken naalisto a pannakalutona daytoy isu a mabalin a kanen daytoy para iti pammigat, pangngalda wenno pangrabii. Naim-imas daytoy a kanen iti inapoy ken addaan ti tomato wenno banana ketchup.
Naammoan a sumagmamano kadagiti nairekomendar a panganan a mangididiaya ti naimas a torta a tarong ket ti Kitchen and Bar idiay Makati, La Preciosa Restaurant iti Laoag City ken LZM Restaurant idiay Tagaytay.
Kabayatanna, nagun-od ti Ajitsuke tamago ti Japan ti umuna a puesto nga addaan ti kapada a 4.4 rating.
Iti napalabas, adda iti maikalima a puesto ti torta a tarong iti listaan ti TasteAtlas para iti 100 a kaimasan a taraon dagiti Pilipino idi 2024.
