LAOAG CITY – Kinumpirmaran ni Police Major Dionisio Baldillo, chief fo police ti PNP-Bacarra a naisaguday iti Executive Order No. 2021-015 ni Mayor Fritzie dela Cruz Gapasin ti total liquor ban iti nasao nga ili.
Segun kenni Baldillo, ita nga aldaw ket strikto a maipatungpal daytoy gapo ta iti panagpatrolya da idi rabii ket nawarningan pay laeng dagiti nakita da.
Inlawlawag na a dagiti matiliwan nga aglabsing iti daytoy ket mapatawan ti multa.
Karaman pay iti E.O ti mayor ti pannakaipawil ti pannaggu-umong no sadino a malimitaran laeng iti 15 ti agatendar ti indoor gathering idinto nga agingga 40 a tattao iti outdoor.
Mainaig iti daytoy, agtalinaed a nakarikep dagiti pagpasyaran iti baybay, karayan, picnic sheds ken dadduma pay iti nasao nga ili.
Saan met a maipalubos ti dine in kadagiti food establishments ken adda ti curfew manipod alas onse ti rabii agingga iti alas kwatro ti bigat.
Iti agdama ket adda ti 14 nga aktibo a kaso ti covid-19 iti nasao nga ili.
