LAOAG CITY – Kinumpirmaran ni Barangay Chairman Rex Camaquin iti Barangay Cabangaran iti ili ti Vintar nga inpatungpal da ti total lockdown kas wagas tapno maprebentaran ti mabalin nga ad-adda a panagwaras ti virus.
Daytoy ket kalpasan nga adda dagiti nakapulapol ti kameng ti PNP a nakadestino idiay La Union, idi nagturong iti nadakamat a barangay ken rumrumwar a daytoy ket nagatendar iti pabunyag ken adda ti panagi-inom a napasamak.
Segun kenni Camaquin, desisyon da daytoy tapno saan nga agwaras iti kabangibang a barangay nangruna ket ado ti dumalyasat iti lugar da.
Inbatad na a dagiti 17 a miembro ti pamilya ti asawa ti pulis ket dimmalan metten ti swab test idi Lunes ken maiyus-uray ti resulta na.
Kunana nga umabot iti 25 amin dagiti dimmalan iti swab test a nadeterminar a nakapulapol ti positibo a pulis.
Mainaig iti daytoy, dagiti met residente iti nagduduma a barangay nga apektado iti panagdallaysat da iti lugar ket mabalin da a magna iti Barangay Isic-Isic, Barangay Cabayo, ken Barangay Dagupan iti nadakamat met laeng nga ili.
Pinalagipan met ni Camaquin ti publiko a sumurot kadagiti pagalagadan tapno maliklikan ti panagawaras ti virus.
