LAOAG CITY – Nagsagaba ti sugat iti ulo ti nangiturong ti Toyota Hilux kalpasan a naidungpar daytoy iti maysa a naka-parking nga Isuzu Elf Truck iti of Sitio Bato iti Brgy. 6 Tonoton iti ili ti Piddig.
Ti nangiturong ti Toyota Hilux ket maysa a pulis nga agtawen ti 38, awanan asawa ken nakadestino iti Piddig Municipal Police Station ken residente ti Brgy. 27 ditoy siudad ti Laoag.
Ti nangiturong met ti Isuzu Elf Truck ket maysa a driver nga agtawen ti 42, naasawaan ken residente ti Brgy. San Juaquin iti ili ti Sarrat.
Basar iti Piddig Municipal Police Station, kabayatan a dumaldalyasat ti nangiturong ti Toyota Hilux nga agpa-laud ket kellaat a dinungparna ti naka-parking nga Isuzu Elf Truck.
Gapu iti daytoy, nasugat ti ulo ti nangiturong ti Toyota Hilux ken dagus a naitaray iti Piddig District Hospital ngem naiyakar daytoy iti Mariano Marcos Memorial Hospital and Medical Center iti siudad ti Batac idinto a saan met a naan-ano ti nangiturong ti Isuzu Elf Truck.
