LAOAG CITY – Rumrummuar a ti trabaho iti Armed Forces ti addaan ti kangatoan ti inaldaw a sueldo ditoy Pilipinas idi Oktubre ita a tawen.
Daytoy ket basar iti kaudian a resulta ti Labor Force Survey nga inruar ti Philippine Statistics Authority (PSA).
Iti Armed Forces occupations, ti average daily wage ket adda ti P1,301, ngimmato daytoy manipud iti P1,173 iti kada aldaw idi Oktubre 2023. Karaman kadagiti trabaho nga agsusueldo ti nasao a gatad ket sakupen amin dagiti miembro ti Armed forces malaksid laeng iti civil defense kas ti police ken customs inspectors.
Maikadua dagiti professional, kangrunaan nga agsusueldo ti P1,168 iti kada aldaw manipud iti P1,135 per day year-on-year a sueldo. Karaman kadagiti agtartrabaho iti fields of sciences, social sciences, legal and social services, art ken dadduma pay.
Maikatlo a top paying jobs ket dagiti managers nga agsusueldo ti P1,109 iti kada aldaw uray bimmaba daytoy manipud iti P1,254 nga inaldaw a sueldo idi Oktubre 2023.
Maikapat dagiti technicians ken associate professionals a makaaw-awat ti inaldaw a sueldo nga P826 idi Oktubre 2024, ngimmato daytoy ti P785 year-on-year wage.
Maikalima met dagiti clerical support workers a makaaw-awat ti P740 nga inaldaw a sueldo idi Oktubre 2024 manipud iti P706 idi Oktubre 2023.
Kabayatanna, dinakamat ni USec. Mapa dagiti lima a trabaho nga addaan ti kababaan nga inaldaw a sueldo iti pagilian idi Oktubre iti agdama a tawen. Karaman ditoy dagiti skilled agricultural forestry and fishery workers, elementary occupations, service and sales workers, craft and related trades workers ken plant and machine operators and assemblers.
