LAOAG CITY – Inpasingked ni Mrs. Jennifer Frances Gapuzan, Community Affairs Officer II ti Community Affairs Office ditoy siudad ti Laoag a naiget ti pannakai-deploy dagiti traffic enforcer kadagiti maibilang a busy intersection ditoy siudad ti Laoag.
Inbatadna a daytoy ket tapno maliklikan ti panagirot ti taray ti trapiko aglalo iti malem wenno iti oras ti panagaawid dagiti estudiante ken mangmangged.
Inlawlawagna a no awanen dagiti mai-deploy a traffic enforcer ket makita a saan dagitoy nga agbibinnigay isut gapuna nga adda latta dagitoy a mangmanihir iti trapiko.
Mainaig iti daytoy, kuna ni Gapuzan nga adda payen ti pannakaiyalud-od ti oras a panagtrabahoda wenno panagaawid iti malem tapno masigurado a saan nga umirot ti trapiko.
Innayonna a babaen kadagitoy nga addang ket masigurado nga awan ti tumaod a problema kadagiti motorista.
